33. สมฺโมทมานชาตกํ
[33]
สมฺโมทมานา คจฺฉนฺติ, ชาลมาทาย ปกฺขิโน;
ยทา เต วิวทิสฺสนฺติ, ตทา เอหินฺติ เม วสนฺติฯ
สมฺโมทมานชาตกํ ตติยํฯ
34. มจฺฉชาตกํ
[34]
น มํ สีตํ น มํ อุณฺหํ, น มํ ชาลสฺมิ พาธนํ;
ยญฺจ มํ มญฺญเต มจฺฉี, อญฺญํ โส รติยา คโตติฯ
มจฺฉชาตกํ จตุตฺถํฯ
35. วฏฺฏกชาตกํ
[35]
สนฺติ ปกฺขา อปตนา, สนฺติ ปาทา อวญฺจนา;
มาตาปิตา จ นิกฺขนฺตา, ชาตเวท ปฏิกฺกมาติฯ
วฏฺฏกชาตกํ ปญฺจมํฯ
36. สกุณชาตกํ
[36]
ยํ นิสฺสิตา ชคติรุหํ วิหงฺคมา, สฺวายํ อคฺคิํ ปมุญฺจติ;
ทิสา ภชถ วกฺกงฺคา [วงฺกงฺคา (สฺยา.)], ชาตํ สรณโต ภยนฺติฯ
สกุณชาตกํ ฉฏฺฐํฯ
37. ติตฺติรชาตกํ
[37]
เย วุฑฺฒ [วทฺธ (สี. ปี.)] มปจายนฺติ, นรา ธมฺมสฺส โกวิทา;
ทิฏฺเฐว ธมฺเม ปาสํสา, สมฺปราเย จ สุคฺคตีติฯ
ติตฺติรชาตกํ สตฺตมํฯ
38. พกชาตกํ
[38]
นาจฺจนฺตํ นิกติปฺปญฺโญ, นิกตฺยา สุขเมธติ;
อาราเธติ นิกติปฺปญฺโญ [อาราเธ นิกติปฺปญฺโญ (ปี.)], พโก กกฺกฏกามิวาติฯ
พกชาตกํ อฏฺฐมํฯ
39. นนฺทชาตกํ
[39]
มญฺเญ โสวณฺณโย ราสิ, โสณฺณมาลา จ นนฺทโก;
ยตฺถ ทาโส อามชาโต, ฐิโต ถุลฺลานิ [ถูลานิ (ก.)] คชฺชตีติฯ
นนฺทชาตกํ นวมํฯ
40. ขทิรงฺคารชาตกํ
[40]
กามํ ปตามิ นิรยํ, อุทฺธํปาโท อวํสิโร;
นานริยํ กริสฺสามิ, หนฺท ปิณฺฑํ ปฏิคฺคหาติฯ
ขทิรงฺคารชาตกํ ทสมํฯ
กุลาวกวคฺโค จตุตฺโถฯ
ตสฺสุทฺทานํ –
สิริมาตลิ ธีตร ปกฺขิวโร, รติยาคโต มาตาปิตา จ ปุน;
ชคตีรุห วุฑฺฒ สุกกฺกฏโก, ตถา นนฺทกปิณฺฑวเรน ทสาติฯ
5. อตฺถกามวคฺโค
41. โลสกชาตกํ
[41]
โย อตฺถกามสฺส หิตานุกมฺปิโน, โอวชฺชมาโน น กโรติ สาสนํ;
อชิยา ปาทโมลมฺพ [ปาทโมลุมฺพ (สี. สฺยา. ปี.)], มิตฺตโก วิย โสจตีติฯ
โลสกชาตกํ ปฐมํฯ